باخ!!!

         آلقيش عمي

 

نه آلدي نه ساتدي دئدي:

 -اؤلوبسن

ائله اؤلوبسن كي سانكي هئچ بير زامان ديري دئييلميش‌سن!

داغ اولسايديم داغيلديم

كول اولوب ساوريلديم

بار-بار باغيرديم:

-يوخ ديري‌يم من

گئديرم

گليرم

حؤكوم سوروروم

توپورجه‌ييم گولله يئرينده‌دير

چوخلارينين جاني منيم اليمده‌دير

نه دئييرسن آبدال

دؤشوم ده-تكجه سول دؤشوم‌ده-

آغيرليغينجا ميداليم وار منيم

باخ !

گؤرنه ازيرم

آياغيم وار منيم

باخ باخ  !

گؤرنه دؤيورم

قولومو وار منيم

چوماغيم وار منيم

باخ

باخ

آخ

خ

خ

.

.

.

 

نوشته شده توسط آلقیش عمی در 87/10/30 ساعت 11:41 موضوع | لینک ثابت

تاپديق اوغلانين ناغيلي

                                        آلقیش عمی

گونلرين بير گونونده،شاه عابباسين دوربونونده،ترزيه ووردو تكان ايكي قوز بير گيردكان.شهرلرين بيرينده بير كيشي ايله آروادي ياشيردي.بونلارين اوجاقلاري كور ايدي.داوا -درمان،نذير-نياز دا كار ائله‌مه‌ميشدي.بير گون كيشي ايشدن گليردي،بير دَوريشه توش گلدي,دوريش او شهرده غريب اولدوغوندان دئييب بيرليكده گلديلر ائوه.دوريش ال آتدي جيبينه بير پاپريز چاغالديب توستوله‌سين،بوش پاكات گلدي الينه.ائو يييه‌سينه دئدي اوغلاني گؤندر منه بير پاكات پاپريز آلسين.كيشي‌نين بئكئف اولماغيندان سونسوز اولدوغونو آنلادي.دوروب گئدنده بير قيرميز آلما وئريب دئدي:

بو آلماني بو گئجه آرادان بؤلوب ياريسين سن ياريسيندا آروادين يئسين آللاه تعالا سيزه بير اوشاق وئرجك.

آلماني آليب گئجه يئييب ياتديلار.دوققوز آي,دوققوز گوندن سورا  ووردو بونلارين بير اوغلانلاري اولدو.تاپديق اولدوغونا گؤره ائله آديني « تاپديق » قويدولار.

آي دولاندي ايل دولاندي گون او گون اولدو كي « تاپديق» ديپلم قلينجي الينده گوونه-گوونه دانشگاه دئييب آتلاندي.آز گئتدي,چوخ گئتدي بير قاريش يول گئتدي,تپه‌لردن يئل كيمي,دره‌لردن سئل كيمي,آياقلار اؤزنگي ده ديزلر قابيرغا دا گلدي چاتدي دانيشگاها.قاپيدا كونكور آد دا بير ساري دئو قاباغيني توتوب باغيردي:هارا؟

بونلار توتوشوب,خئيلك ال به ياخا اولاندان سورا « تاپديق»دئوه باتانماييب,سويو سوزوله-سوزوله ائولرينه قاييتدي.آناسي اونون پريشان حاليني گؤروب,خئيلك باشينا دولانيب قادا-بالاسين آلاندان سورا توختاخليق وئريب دئدي:« دولتي دانيشگاه اولمادي,اولماسين اوره‌يه‌ن لكه دوشمسين,جانيميز چيخار پول وئريب اوخوداريق.»

باشيزي نه آغريديم,او گوندن آرواد كيشي‌يه چؤره‌يي0000آ بير تيكه داش ائله‌دي.بير ديل اولدو بير آغيز:«هر نه جوره‌سي دير،هار دا اولاسي دير،« تاپديق»-ي پول آليب ايچريه بوراخان دانيشگاه‌لارين بيرينده اوخودمالييق.»

كيش دئدي:«آي آرواد او دانيشگاه‌لار بئله بيزيم آغزيميزين يئمي دئييل.فهله بابانين بيري‌يم, جيندريمدان جين هوركور.»

آرواد گؤزلريني بره‌لديب دئدي:«آللاه ائله سنين چيليس‌ليغين گؤروب سنه ائولاد وئرمه‌ييب,به‌يه سن منيم صيغه باجيمين يئرينده اولاردين:دورد قيزي وار دؤردونو ده پولوينان اوخودورلار.بؤيوك قيزلاري«مصمه»آزاد دا ليسانس آلالي ائله اوردا فوق ليسانس اوخور.اوندان كيچيك «صورا»پيام نور دا اوخور,فاطمالاري  بيلدير شبانه دن چيخدي, بيزيم اوغلانينان ياشيت اولان خججه‌لري ده اونلارين هاميسينا يازيليبدير به‌يه بيريندن آدي گله,باخ گؤروم بيزيم اونلاردان نَييميز اسگيك دير بير بو تاپديق اوغلوموزو اوخودانماياق؟!»

باشيزي نه آغريديم,كيشي دئدي ائركك دي,آرواد دئدي ساغ.او دئدي يومورتا دي,بو دئدي قيرخ.او دئدي دامارا باخيب قان آلارلار,يورغانا گؤره قيچي اوزادارلار,بو دئدي چوبانين گوْيلو اولسا تكه دن سوت ساغار.او دئدي آج آيي اويناماز,بو دئدي نئجه اويناماز,ائله اويناداريق.ديب‌ده آرواد گؤردو خوش ديل ايله اولمور,گوجونو ييغدي بيله‌يينه ائله بير قاش-قاباق,ائله بير فيريشنا-تيريشنا گلدي كي كيشي‌نين ديلي0000آ بير تيكه تاختا اولدو.اوره‌يينده:«آرواد نه بيلير داغدا دوماندي,ائوده اوتوروب حؤكمو رواندي»دئيه‌رك,پول وئريب اوخودماغا راضي اولدو.

ووردو«تاپديق»-ين آدي ائله او ايل آزاد دان گلدي.آياغدا گئيينيب باشدا قيفيللاندي,باشدا گئيينيب آياقدا قيفيللاندي,بير خيشما  آتاسينين نئچه آي قازانديغي پوللاردان جيبلرينه تپيب,تاتارلاندي گئتمه‌يه,تو دابانا قووت دانيشگاها ساري.جوت-جوت قارپيز لاپ او يئكه‌لريندن قولتوقلاريندا،ها گئتدي هو گئتدي ، نئچه ايل كئچدي.

ايندي «تاپديق»مدرك الينده بوخاق گؤبگينده بورا-اورا كي منه ايش. هاني ايش,جان ايسته ايش ايستمه.هر يئردن الي اوزولوب آتي اؤلموش عرب كيمي قاش-قاباق يئري سوپوره-سوپوره گلدي ائوه.

بيلميرم بو ادواري استخدام فورمودو,بو ايش تاپما فورمودو,000000

بونا بئش,اونا اون بئش,مين‌ليقلاردي كي گونده حسابلارا توكولوب قبيض‌لري كوپه آغزينا قويولور!

آلقيش اولسون بو حسابلاري آچانلارا كي اوچ-دؤرد مين تومن اينن  مدرك‌لي جوانلاردا اومود وارچيليق ياراديرلار كي:« ائششييم اؤلمه يونجا بيتينجه, يونجا بيتمه ائششك اؤلونجه»!!

گؤيدن بير ايش دوشدو هر كيم قاپسا اونون.

                                                                      بو یازی "یارپاق"درگی سینده چاپ اولونوبدور   

دئييرلر-دئييرم

1

دئييرلر: قيبله دووارينا ديرك،شيطان قولاغينا داش-كسسك،اؤلمه‌ديك گؤردوك كي شهرداري نئچه ايل يئرده قالميش اؤلونو گؤتوروب او 35متر خياواني باشا يئتيردي.

دئييرم: سسيني چاغارتمايين،چو سالمايين كي يان-يؤره ده پيشيك چوخدو.

دئييرلر: اوستوراخدان قولونجا نه؟!

دئييرم: بيري جييه‌ر ساتيردي،سسليردي:آي بينه ،آي بينه.دئديلر:آي دايي جيگر ساتيب،بينه سسليرسن؟!دئدي:پيشكلر ائشيديب يوگورمه‌سينلر.

دئييرلر:به دئ دا،ائله اونا گؤريميش،شهرداري بئله بير بؤيوك ايشي گؤروب ،اوستونو ده وورماييب،خبرلرده فقط نئچه پاركين آچيلماغيني موژده وئريبدي،نابادا-نابادا كي اوبيري ايداره‌لر خصوصا بو مخابرات ايله فاضلاب ايداره‌سي ائشيديب قازما-بئل الده:دايان كي گلديك.

2

دئييرلر: آللاه هئچ كيمين ايشيني بو عدليه ايداره‌سينه سالماسين.اورا ايشي دوشنين گرك ايوب پيغمبرجه صبري،نوح پيغمبر جه عؤمري اولا.

دئييرم: قارون پيغمبر!! جه ده گرك گنجي اولا.

3

دئييرلر: رحمتليك ايمام بويوروب كي« ميزان ميللتين راي دير»

دئئيرم: بلي ايمام بويوروب چوخدا گؤزل بويوروب,بو اويئرده دير كي ميللت اولا،ايندي گلديك ميللت اولمادي؟اوندا نئجه اولاجاق؟!

دئييرلر: بوراسيني اوخوماميشديق.!

دئييرم: اوخوماميسيز- اوخويون، توخوماميسيز- توخويون,ميللت اولمويان يئرده «ميزان آغالارين راي دير !!»

4

دئييرلر: داها نه خبر؟

دئييرم: مؤعلليم‌لره آللاه بالام دئييب.

دئييرلر: نئجه مه‌يه؟

دئييرم: بيري تاپيليب نه تاپيليب,مؤعلليم‌لره درجه وئرير.

دئييرلر: كي نويولسون؟!

دئييرم: نئجه نويولسون,درجه يعني حقوقلارين چوخالماسي,درجه يعني ائعتيبار,ايمتياز,يعني حاق,حاقليا,حاقلاسين.درجه يعني آلقيش او-وَه درجه يعني هر شئي,….

5

دئييرلر: بو ايلده گلدي،ياري اولدو،گئنه هئچ زاد اوجوزلانمادي.

دئييرم: اوجوزلاناجاق.

دئييرلر: به هاچان ؟!

دئييرم: دوه باشيندا بورنوز چيخاندا.

دئييرلر: به نئيله‌يك ؟

دئييرم: آلقيشلاياق

دئييرلر: كيمي؟

دئييرم: كيليم‌چي‌ني.

                                                                                                آلقيش عمي 29/4/83  

بو یازی باغچه بان درگی سینده چاپ اولونوبدو

 

 

    

 

نوشته شده توسط آلقیش عمی در 87/10/20 ساعت 19:24 موضوع | لینک ثابت

                 آغاجلار

                     *آلقیش عمی

 

آغاجلار نه دئییرلر؟

ندنسه

پیچیلداییرلار

بوداق-بوداغا

قولاق-قولاغا.

آغاجلار

سویا آخمیشلار

یئله اسمیشلر

یاغیشا یاغمیشلار

نه دئییرلر؟

نه لر دئییرلر

یایین بو گون اورتاسیندا

بو جیزلاماسیندا؟!

کیمسه دینله‌مه‌دی آغاجلاری

کیمسه دویمادی اونلاری.

 

گئنه پاییز گلیر

گئنه سوپورگه چکیر

قونقوزلو قوجا سوپورگه‌چی؛

آخشام چاغیلار

شام چاغیلار

چاغیلار

آغیلار

غار

غار

غار

.

.

.

 

 

نوشته شده توسط آلقیش عمی در 87/07/01 ساعت 18:44 موضوع | لینک ثابت

آغاجی

 

                     آلقیش عمی

آغاجی

 

بالتا قورخوسو

 

ارکن پاییزا دوشگون ائله‌مه‌دی

 

آغاج

 

بیر آن

 

یالنیز بیر آن

 

گونشین وارلیغینا

 

شک ائله‌دی.

 

نوشته شده توسط آلقیش عمی در 87/05/11 ساعت 23:7 موضوع | لینک ثابت

                                

                                   مودئرن یاشام

                                                                *  آلقيش عمي

قارانلیق

         و دار

                داخمالارا ،

آپارتیمانیزم دئییب،

آنتئنیمیزه قارغا قونماسین

بوشقابیمیزی یئل آشیرماسین دئیه،

کاناپادا اوزانیب باغریمیزا باسیریق یاسدیغی،

و مودئرن یاشاماغی تامیسینیریق بیرلیک‌ده.

بوشقاب‌دا هالیوود سالادی یئیَه‌رکن آغا،

جیب تئلئفون‌دا  پرده‌لر موداسیندان

                                       دانیشیر خانیم

و اوشاق تک باشینا

                بیلگی‌سایاردا

دئولری،

خورتدان‌لاری

دویمه‌لرله اؤلدورور.

 

                *****************             

                      یئنی بیر اوْلای

                                                                 * آلقيش عمي

بوگون ائرته چاغی

ایشینین باشینا یورویَن بیر کیشی

مئترو دوراغیندا

سککی‌دن دوشمه‌یی ایله

                         قاتار آلتیندا

                                جان وئرمه‌یی بیر اولدو.

دئمه جانیم،

              کیشی

                     دون گئجه،

اویانا باخیر،

بویانا باخیر،

              قورخا-قورخا

                  آروادی‌نین قولاغینا بیر سؤزلر دانیشیر.

دئمه آروادین قولاغینداکی قیرخ آیاق،

ساییر یازیق کیشی‌نین

                          دیشلرینی.

 

نوشته شده توسط آلقیش عمی در 87/02/10 ساعت 22:20 موضوع | لینک ثابت

سوس !

 

-سوس....

-سوس دئییلنده،

 سوسقونلوق جیریلدی

 بیر آغ یوخا کاغیذ کیمی.

-سوس...

-سوس دئییلنده،

 سوسقونلوق اووولدو،

 بیر اسکی کیتاب آراسیندا

 اونودولموش یارپاق کیمی.

-سوس...

- سوس دئییلنده

 سوسقونلوق پوزولدو

 بیر قاریمیش قیزین قیزلیغی کیمی.

-سوس...

-سوس دئییلنده

 باشا دوشدوک بیز ده واریق،

باشا دوشدوک بیزدن ده بیر سس چیخا بیلر.

-سوس...

-سوس دئییلنده

 دیلیمیز یادیمیزا دوشدو

 دانیشماغیمیزدا

 آنادان اؤیرندیمیز سؤزجوک لرده.

-سوس س س.....

 

نوشته شده توسط آلقیش عمی در 87/01/09 ساعت 16:37 موضوع | لینک ثابت

                        قارقيش عمينين يئره ده يمه يي

 

بير گون قارقيش عمي اوش توفك چرخي ايله تله سيك بير ايش دالينجا گئديردي ، چرخين ته يه ري خيابانين چالا-چوخورونا دوشه رك فرمان اليندن چيخيب يئره

ده يدي. دوروب اوستو باشيني سيلكلدي .ايسته دي چرخه مينسين گوردو چخدن چخ  چيخماز ! قاباق منتشي ايكي قات اولوبدي. جيجيهدن آياغيني يئره دويوب دئدي:"آي خياوان سن نه ظاليم سن."

خياوان دئدي :"من ايه ظاليم اولسايديم گونده قازيلمازديم ."

قارقيش عمي باخدي گوردي تورپاغلارين اوستونده بير قازما وار قازماني گوتوروب دئدي:"آي قازما سن نه ظاليم سن ."

قازما دئدي:"من ايه ظاليم اولسايديم پيمانكارا ساتيلمازديم."

پيمانكارا دئدي:" سن نه ظاليم سن."

دئدي:"من ايه ظاليم اولسايديم شهردار-ي ياغلامازديم."

دئدي:"آي شهردار سن نه ظاليمسن ".

شهردار دئدي:"من ايه ظاليم اولسايديم شوراني سايمازديم".

دئدي:"آي شورا سن نه ظاليم سن."

دئدي :" ظاليمم آي ظاليمم ،كورسو اوسته دورارام بيغ لاريمي بورارام آرتيق دانيشانلاري شاپالاغينان وورارام."

قارقيش عمي چرخيني چينينه آتيب يولا دوشه ره ك چرخينه بئله دئدي:

"آي ياراماز چخ گوروم بونداندا پيس گونه قالاسان  گورموردون چالا گئچير.!

                ×××××××××××××××××××

بيستوني يازان افندي بو ناغيلدان بئله نتيجه آلير:

اخلاقي نتيجه: چخلرين گوزلري اويان بوياندا اولماسين.

توريستي نتيجه: شهرين گوزلليگي ها بئله اوزه لليگي آرخاييك چالالاريندادي.

رواني نتيجه: چالاني گوزلري گوتورموينلر يا عقده ايدلر يادا پاخيل

فولكلوريك نتيجه: سوندان آتان قارقيش منتشه  ده يه ر.!!

 

نوشته شده توسط آلقیش عمی در 85/10/08 ساعت 16:52 موضوع | لینک ثابت